Համակարգը ստեղծվել է ՀՀ-ում գործող արդար ու օբյեկտիվ դատավորների աշխատանքը գնահատելու և աջակցելու նպատակով: Կարծում ենք, որ բարեխիղճ, գրագետ և փաստաբանների կողմից ընդունված դատավորներին նաև նյութապես շահագրգռելն էլ ավելի կնպաստի նրանց կողմից արդարադատության իրականացմանը, ինչպես նաև պատճառաբանված ու համոզիչ դատական ակտեր կայացնելուն: Արդար է, երբ արդար դատավորը ստանում է արդարացի վերաբերմունք: Բացի դատական մարմիններին աջակցելուց, համակարգը նաև հանդիսանում է փաստաբանների համար լրացուցիչ գործիք իրենց վստահորդների շահերը առավել լիարժեք պաշտպանելու առումով: Մասնավորապես, համակարգում տեղադրվում և ֆիլտրված կարգով հանրության դատին են ներկայացվում ուշագրավ դատական ակտեր, որոնք ուղղակիորեն ազդում են այն կայացրած դատավորի վարկանիշի վրա: Համակարգը կնպաստի նաև իրավաբանական աշխատաշուկայում գործատուների կողմից առավել արդյունավետ համապատասխան աշխատողներ ընտրելուն: Մասնավորապես, հրապարակված դատական ակտերը մեկնաբանելու հնարավորություն ունի յուրաքանչյուր ոք, որն էլ կարող է նպաստել համապատասխան գործատուի կողմից նկատվելուն և հետագա համագործակցության ձևավորմանը: